Акафист Пречестному и Животворящему Кресту Господню

Кондак 1

Возбранный Воеводо и Господи, смерти и ада победителю, Крестом Твоим и воскресением спасение мира соделал еси посреде земли. Но яко имеяй милосердие неизреченное, спаси нас, Сыне Божий, плотию распныйся за ны, да зовем Ти:

Кресту Твоему покланяемся, Владыко, и Святое Воскресение Твое славим!

Икос 1

Ангелов Творец и Создатель всего видимаго и невидимаго, сотворивый человека и по грехопадении его не отринувый, ибо Сын Божий, представ, рече Богу и Отцу: «Се иду сотворити волю Твою, Боже», — страшныя страсти, Крест и вольную смерть предначертая Себе, сего ради поклонение Тебе, Спасе наш, приносим, милосердие Твое, прежде сложения мира явленное нам, величающе сице:

Кресту Твоему покланяемся, Христе, имже показал любовь Отца Небеснаго.

Кресту Твоему покланяемся, Христе, имже явися любовь Духа Святаго, силою крестною торжествующая.

Кресту Твоему покланяемся, Христе, имже известися Пресвятыя Троицы правда милосердствующая.

Кресту Твоему покланяемся, Христе, яко той есть совершение нашего спасения.

Кресту Твоему покланяемся, Христе, яко той есть от века таинства явление.

Кресту Твоему покланяемся, Владыко, и Святое Воскресение Твое славим!

Кондак 2

Видя прегрешившия человеки зельне плачущия, Господи, умилосердився, надежду спасения подал еси им, глаголя: «Семя жены сотрет главу змия и рай паки отверзет вам», — сице и о нас умилосердися, Человеколюбче, и грехами умерщвленныя наши души воскреси, зовущия: Аллилуиа.

Икос 2

Разум недоразуменных обетований Твоих уразумети подавая, в образах и сени Креста Твоего силу показал еси, Господи, о сем Тебе Самаго Бога разумов славим, поюще сице:

Кресту Твоему покланяемся, Христе, егоже тайнодейственно Авраам жертвоприношением Исаака предъизобрази.

Кресту Твоему покланяемся, Христе, имже Иаков пременением рук образне дети благослови.

Кресту Твоему покланяемся, Христе, имже Израиль из Египта изведеся.

Кресту Твоему покланяемся, Христе, егоже силою море пресечеся.

Кресту Твоему покланяемся, Христе, имже Моисей из камени воду источи.

Кресту Твоему покланяемся, Христе, имже жезл Ааронов процветший священство утверди.

Кресту Твоему покланяемся, Владыко, и Святое Воскресение Твое славим!

Кондак 3

Силою свыше пророки Твоя облекл еси, Спасе наш, и, от Святаго Духа просвещаеми, глаголаша святии Божии человецы, Крест Твой предвещающи, яко овча на заколение ведеся, Агнче Божий, вземляй грехи мира. Облецы и нас теплотою Духа Твоего и даждь нам, с любовию Кресту Твоему поклоняющимся, пети Тебе: Аллилуиа.

Икос 3

Имеяй богатство милосердия, тако возлюби Бог мир, яко и Сына Своего Единороднаго дал есть, Егоже, яко агнца закланнаго, прежде сложения мира многообразне яви. Сих ради приносим Тебе песнь славословия таковую:

Кресту Твоему покланяемся, Христе, имже медный змий, на древо вознесенный, от змиев укушенныя исцели.

Кресту Твоему покланяемся, Христе, имже люди, умерщвленныя грехом, оживотвори.

Кресту Твоему покланяемся, Христе, егоже силою враги победи преподобных рук вознесение.

Кресту Твоему покланяемся, Христе, имже всем твориши от бед избавление.

Кресту Твоему покланяемся, Христе, имже древо, вложенное во источник, естество вод измени.

Кресту Твоему покланяемся, Христе, егоже знамением жезл ангельский Гедеонову жертву воспламени.

Кресту Твоему покланяемся, Владыко, и Святое Воскресение Твое славим!

Кондак 4

Бурю внутрь имеяй помышлений сумнительных, Исаия виде на престоле образно превознесеннаго Бога и вопияше: «Окаянен есмь человек, нечистыя устне имый». Ты же к нему: «Иди и рцы людем Моим слово Мое». И шед, явственно благовести Спаса всех: яко Той язвен бысть за грехи наша и мучен бысть за беззакония наша. Мы же, познавше Тебе, распеншагося за нас, Егоже язвами исцелехом, благодарственно вопием: Аллилуиа.

Икос 4

Слышавши апостоли Твои, Господи, неизреченныя предвещания Твоя, яко подобает Тебе много пострадати, убиену быти и в третий день воскреснути, не разумеваху таинства Креста Твоего, зане сокровен бысть от них глагол сей, дондеже отверзе им ум разумети писания, просвети убо очи мысленныя нас, вопиющих Тебе и глаголющих:

Кресту Твоему покланяемся, Христе, имже умы и сердца верных просвещаеши.

Кресту Твоему покланяемся, Христе, имже сумнящихся в вере утверждаеши.

Кресту Твоему покланяемся, Христе, имже грешники к покаянию обращаеши.

Кресту Твоему покланяемся, Христе, имже демонов от человек прогоняеши.

Кресту Твоему покланяемся, Христе, яко той есть упования христианскаго знамение.

Кресту Твоему покланяемся, Христе, яко той есть Церкви Твоея венчание.

Кресту Твоему покланяемся, Владыко, и Святое Воскресение Твое славим!

Кондак 5

Боготочною кровию Твоею, на Кресте излиянною, искупил ны еси от клятвы законныя, распятие претерпев и копием прободся, Спасе наш, сего ради вопием Тебе: Аллилуиа.

Икос 5

Видевше жены еврейския Тебе, грядущаго на вольную страсть и падающаго под тяжестью Креста Твоего, Иисусе, плакахуся зело. К ним же обращся, Ты рекл еси: «Дщери иерусалимския, не плачитеся о Мне, плачите же паче о себе и чадех ваших, яко дние грядут, в няже рекут: „Блаженны неплоды и утробы, яже не родиша, и сосцы, яже не доиша“, когда начнут глаголати горам: „Падите на нас“ и холмам: „Покройте нас“». Мы же в скорбех и печалех наших припадаем к Тебе, Спасе, на сем пути и вопием:

Кресту Твоему покланяемся, Христе, имже отгоняеши от нас рыдания.

Кресту Твоему покланяемся, Христе, имже приносиши нам радование.

Кресту Твоему покланяемся, Христе, иже есть скорбящим утешение.

Кресту Твоему покланяемся, Христе, иже есть болящих исцеление.

Кресту Твоему покланяемся, Христе, имже даруеши грешникам кающимся прощение.

Кресту Твоему покланяемся, Христе, иже есть умерщвленных грехами воскресение.

Кресту Твоему покланяемся, Владыко, и Святое Воскресение Твое славим!

Кондак 6

Проповедников богоносных вещание и глаголы пророческия исполняя, многовидныя и лютыя страсти, распятие и смерть претерпети изволил еси, Спасе. Мы же, ранами Твоими исцелевше, пети навыкохом: Аллилуиа.

Икос 6

Возсия вселенней Крест Твой всечестный, на немже грехи наша, вознесши на теле Своем, пригвоздил еси, Иисусе. Мы же, спасение получивше, вопием:

Кресту Твоему покланяемся, Христе, знамению любви Твоея неизреченныя.

Кресту Твоему покланяемся, Христе, образу милости Твоея безконечныя.

Кресту Твоему покланяемся, Христе, средостение вражды в человецех разорившему.

Кресту Твоему покланяемся, Христе, Бога с человеки соединившему.

Кресту Твоему покланяемся, Христе, мир на земли явившему.

Кресту Твоему покланяемся, Христе, светом Твоим вся просветившему.

Кресту Твоему покланяемся, Владыко, и Святое Воскресение Твое славим!

Кондак 7

Хотя сокровенную тайну от века открыти, яко овча на заколение веден был еси, Иисусе, и, яко агнец прямо стригущаго его безгласен, наказание за грехи всего мира прием на Себя, да нас свободиши, зовущих: Аллилуиа.

Икос 7

Дивное показал еси на Кресте Твоем Божественное истощание, Сыне Божий. Темже чудящеся, вопием:

Кресту Твоему покланяемся, Христе, на немже претерпел еси язвы гвоздиныя.

Кресту Твоему покланяемся, Христе, на немже вкусил еси оцта и желчи смешение.

Кресту Твоему покланяемся, Христе, на немже вися, слышал еси хулы и ругания.

Кресту Твоему покланяемся, Христе, на немже бе вины Твоея написание.

Кресту Твоему покланяемся, Христе, на немже вещал еси Матери Твоей утешение.

Кресту Твоему покланяемся, Христе, на немже учредил еси ученика Твоего Матери Твоей всыновление.

Кресту Твоему покланяемся, Владыко, и Святое Воскресение Твое славим!

Кондак 8

Странна Бога вочеловечшася видяще на Кресте висяща, мертва, нага, умалена паче всех сынов человеческих, устранимся суетнаго мира, ум на небеса преложше. Сего бо ради высокий Бог на землю сниде, и Крест, и смерть претерпе, да нас на небеса возведет, вопиющих Ему: Аллилуиа.

Икос 8

Весь еси любовь, весь еси желание, весь еси благость, весь еси снисхождение, весь еси милосердие и щедрот бездна, Сыне Божий, волею ради нас пострада, и смертию Своею смерть умертви, и Кровию Своею жизнь нам дарова, поющим:

Кресту Твоему покланяемся, Христе, имже ниспосылаеши светлость душевную.

Кресту Твоему покланяемся, Христе, имже даруеши нам сладость сердечную.

Кресту Твоему покланяемся, Христе, имже помогаеши нам стяжати быстроту умную.

Кресту Твоему покланяемся, Христе, имже утверждаеши крепость телесную.

Кресту Твоему покланяемся, Христе, имже печатлееши в нас надежду известную.

Кресту Твоему покланяемся, Христе, имже споспешествующи нам сохраняти память предвечную.

Кресту Твоему покланяемся, Владыко, и Святое Воскресение Твое славим!

Кондак 9

Все естество всея твари изменися, зряще Тебе на Кресте висима, Христе, солнце омрачися, и земли основания сотрясошася, гроби отверзошася, и многа телеса усопших святых возсташа, мы же, поклоняющеся страстем Твоим, Христе, зовем: Аллилуиа.

Икос 9

Витии многовещанныя, яко рыбы безгласныя, видим, о Тебе, Иисусе Спасе наш, недоумеют бо глаголати, како Бог непреложный и человек совершенный на кресте пригвождается, мы же, таинству дивящеся, вопием:

Кресту Твоему покланяемся, Христе, не немже пригвоздися Жених Церковный.

Кресту Твоему покланяемся, Христе, на немже в ребра прободеся Сын Божий, во Иордане и на Фаворе нареченный.

Кресту Твоему покланяемся, Христе, на немже руце и нозе предал еси на раны.

Кресту Твоему покланяемся, Христе, на немже лице Твое не отвратил еси от заплеваний.

Кресту Твоему покланяемся, Христе, на немже вопиял еси Отцу Небесному: «Вскую оставил еси Мене, Боже Мой, Боже Мой».

Кресту Твоему покланяемся, Христе, на немже умирая, гласом велиим воззвал еси: «Отче, в руце Твои предаю дух Мой».

Кресту Твоему покланяемся, Владыко, и Святое Воскресение Твое славим!

Кондак 10

Спасти хотя мир, Восточе востоком, к темному западу, естеству нашему, пришед, смирился еси до смерти, смерти же крестныя. Тем же превознесеся Твое имя паче всякаго имене, и от всех колен небесных и земных слышим: Аллилуиа.

Икос 10

Царю Небесный, Утешителю истинный, Христе, разбойника благоразумнаго во едином часе рая сподобил еси, просвети и нас Древом Крестным и спаси, да вопием во умилении хвалебныя песни Кресту Твоему, поюще:

Кресту Твоему покланяемся, Христе, имже подаеши и самым отчаянным грешникам прощение.

Кресту Твоему покланяемся, Христе, имже сподобляеши заблудших вразумления.

Кресту Твоему покланяемся, Христе, яко той есть напаствуемых заступление.

Кресту Твоему покланяемся, Христе, яко той есть падших возстановление.

Кресту Твоему покланяемся, Христе, яко того силою плоть нашу со страстьми и похотьми распинаем.

Кресту Твоему покланяемся, Христе, яко того помощию гордость всяку и грех запинающий нас отвергаем.

Кресту Твоему покланяемся, Владыко, и Святое Воскресение Твое славим!

Кондак 11

Пение всеумиленное приносим Тебе, Спасе наш, Крест Твой животворящий славим, имже спасл ны еси от работы вражия, и благодарственно вопием Ти: Аллилуиа.

Икос 11

Светодательна светильника сущим во тьме неразумия зрим пречестный и животворящий Крест Твой, Господи, имже невещественный вжигающи огнь, наставляеши к разуму Божественному всех, вопиющих таковая:

Кресту Твоему покланяемся, Христе, яко той есть вселенныя держава.

Кресту Твоему покланяемся, Христе, яко той есть Церкви Твоея слава.

Кресту Твоему покланяемся, Христе, яко той есть храмов Божиих украшение.

Кресту Твоему покланяемся, Христе, яко той есть священных таинств веры нашея совершение.

Кресту Твоему покланяемся, Христе, яко той есть честных даров благодатию Святаго Духа освящение.

Кресту Твоему покланяемся, Христе, яко той есть мертвых грехами и плотию воскресение.

Кресту Твоему покланяемся, Владыко, и Святое Воскресение Твое славим!

Кондак 12

Благодать спасения подаждь нам, Жизнеподателю, Христе Боже, честным и животворящим Крестом Твоим, имже суетнаго жития убегаем и благодатей духовных сподобляемся, да, славяще Тебе, поем: Аллилуиа.

Икос 12

Поюще страшныя страсти и животворящий Крест Твой и вольную страсть, яже ради нас человеков и ради нашего спасения претерпел еси, Боже наш, веруем и исповедуем, яко воистину Сын Божий еси, пришедый в мир грешныя спасти, и во умилении зовем:

Кресту Твоему покланяемся, Христе, на немже вознесенный всех к Себе привлекаеши.

Кресту Твоему покланяемся, Христе, имже разбойнику благоразумному рай отверзаеши.

Кресту Твоему покланяемся, Христе, у егоже подножия сотник, Бога не ведущий, исповеда Тебе Сыном Божиим.

Кресту Твоему покланяемся, Христе, яко тем разорил еси вереи преисподней.

Кресту Твоему покланяемся, Христе, яко на нем совершил еси всего рода человеческаго искупление.

Кресту Твоему покланяемся, Христе, яко на нем, смертию Твоею смерть поправ, даровал еси нам воскресение.

Кресту Твоему покланяемся, Владыко, и Святое Воскресение Твое славим!

Кондак 13

О, пресладкий и всещедрый Иисусе Христе, хотяй судити живым и мертвым! Приими сие моление наше, егда явится на небеси в той страшный день знамение Сына Человеческаго, Крест Твой святый, и, узрев Тебе, грядущаго на облацех небесных с силою и славою многою, восплачутся вся колена земная. Тогда нас пощади, Спасе наш, Кресту Твоему поклоняющихся и вопиющих: Аллилуиа.

Этот кондак читается трижды, затем снова 1-й икос и 1-й кондак.

Молитва Святейшего Патриарха Никона, чтомая пред Кийским Крестом в храме преподобного Сергия Радонежского в Крапивниках в Москве

О Пречестный и Животворящий Кресте!

Ты вселенную всю освяти и свет наведе. Ты от востока, и запада, и севера, и юга во едину Церковь, и во едину веру, и во едино крещение и любовь вся связал еси. Ты непобедимый град христианом, победное оружие Царя Христа. Ты еси вселенныя слава и радование, безсильных сила, благочестивых людей победа и укрепление, воинов дерзновение, путешественником спутник, бедствуемых избавление, обуреваемых тишина, монахов сила, мирских хранителю, всех святых святое и честное украшение. Тебе, Кресту Христову, да поклонюся, Тебя да облобызаю, Тебя вседушне целую со страхом и радостию: со страхом за недостоинство мое, с радостию же за благодать, юже ми даруеши. Тобою бо врата райская затворенная паки отверзаются, ад сокрушается, небесная со земными соединяются, оставление грехов даруется. Аз же чадом Божиим и наследником Царствия Небеснаго нарицатися сподобляюся.

О, Кресте Христов, движущихся на мя и борющих страстей море без напасти мимоити устрои, устремляющиеся же на мя волны и бури утиши, мир сотвори, и житие безмятежне ми прейти сподоби. Горесть и болезнь напастей, и бед, и искушения на благость преложи, и умили, и утеши душу мою, падающую унынием и скорбию.

Христе Боже! Помилуй и спаси душу мою силою Честнаго и Животворящего Твоего Креста и святых ради молитв, ихже мощи водружены в сем Кресте, яко подобает Тебе всякая слава, честь и поклонение, со Безначальным Твоим Отцем и со Пресвятым и Благим и Животворящим Твоим Духом, ныне и присно и во веки веков.

Аминь.

Сведения об акафисте и молитве

Акафист перед Крестом Христовым. Автор — Святейший Патриарх Сергий. Библиография: Е. П. Список основных трудов Патриарха Сергия (Страгородского) // Журнал Московской Патриархии. № 4, 1995. Стр. 135–138. В этой публикации гимн именуется «Акафист Живоносному Древу Креста Господня».

Молитва Святейшего Патриарха Никона. Публикация: Слово о Животворящем Кресте // Патриарх Никон. Труды. М., Издательство Московского Университета, 2004. Стр. 85–93.